Հեռավար ուսուցման համալիր էջ

Գլխավոր էջ  /  Նորություններ

Նորություններ

ԿԳՄՍՆ Կրթական տեխնոլոգիաների ազգային կենտրոնը՝ Ինֆորմացիոն ազատության կենտրոնի հատուկ մրցանակակիր

ՀՀ կրթության, գիտության, մշակույթի և սպորտի նախարարության «Կրթական տեխնոլոգիաների ազգային կենտրոն» ՊՈԱԿ-ն Ինֆորմացիայի ազատության կենտրոնի «Ոսկե բանալի, ժանգոտ կողպեք» ամենամյա մրցանակաբաշխության շրջանակում արժանացել է «Հատուկ մրցանակի»։


ԻԱԿ նախագահ Շուշան Դոյդոյանը նշել է, որ տեղեկատվության ազատությանը նվիրված մրցանակաբաշխությունն ազդեցիկ միջոց է խրախուսելու բաց և հրապարակային աշխատանքը, ապահովելու Կառավարության թափանցիկությունն ու հաշվետվողականությունը։

ԻԱԿ-ի «Հատուկ մրցանակը» շնորհվել է Բաց կառավարման գործընկերության հայաստանյան գործողությունների 4-րդ ծրագրի «Կրթական տեղեկատվական միասնական պորտալ» հանձնառությունը հեղինակած և իրականացրած կառույցին՝ Կրթական տեխնոլոգիաների ազգային կենտրոնին՝ համավարակի ընթացքում կրթության և տեղեկատվության հասանելիության ապահովման համար։

«Այս հանձնառությամբ մշակվել և ստեղծվել է «Կրթական տեղեկատվական միասնական պորտալը», որի հեղինակը և իրականացնողը Կրթական տեխնոլոգիաների ազգային կենտրոնն է։ Այս գաղափարն ապահովել է փոխակերպիչ արդյունք և համավարակի ընթացքում կարողացել է ապահովել սովորողների 84 տոկոսի հասանելիությունը տեղեկատվությանը, գիտելիքին և կրթությանը։ Այն համարվում է նորարար և օրինակելի նաև մյուս երկրների համար»,- ասել է Շ․ Դոյդոյանը։

Շնորհակալություն հայտնելով գնահատանքի համար՝ ԿՏԱԿ-ի տնօրեն Արտակ Պողոսյանը նշել է․ «Այս մրցանակն ավելացնում է ԿՏԱԿ-ի պատասխանատվությունը՝ ավելի ակտիվ, ավելի թափանցիկ լինելու, տեղեկատվության ազատության մակարդակը բարձր նշաձողի վրա պահելու առումով։ Շնորհակալ ենք այս մրցանակի համար, և հույս ունենք, որ հաջորդ տարիներին ևս կարժանանանք «Ոսկե բանալու» և երբեք ոչ «Ժանգոտ կողպեքի»։

Տեղեկացնենք նաև, որ առցանց մրցանակաբաշխությանը մասնակցել է պետական կառույցների, զանգվածային լրատվության միջոցների, հասարակական և միջազգային կազմակերպությունների ավելի քան 80 ներկայացուցիչ։

Աղբյուր՝ ՀՀ ԿԳՄՍՆ կայք

Մենթոր դպրոցները կաջակցեն ուսուցիչների կարիք ունեցող հաստատություներին

2021 թվականի սեպտեմբերից «E-school Armenia» նախագծի շրջանակում ընտրված 18 մենթոր դպրոցների ուսուցիչներն էլեկտրոնային եղանակով կդասավանդեն այն հանրակրթական ուսումնական հաստատություններում, որտեղ առանձին առարկաների գծով մասնագետների պակաս կա։ Նախորդ տարի ուսուցչի պակաս ունեցող 101 դպրոցում ստեղծվել են էլեկտրոնային ուսուցման համար անհրաժեշտ սարքավորումներով հագեցված դասասենյակներ։

Ծրագրի շրջանակում կրթության հասանելիությունն ապահովելու նպատակով մենթոր դպրոցները կիրականացնեն անհրաժեշտ առարկաների էլեկտրոնային դասավանդումն այն երեխաների համար, որոնք զրկած են տվյալ առարկան սովորելու հնարավորությունից։

Տեղեկացնենք, որ 2020 թվականի սեպտեմբերից հեռավար դասեր են իրականացվել 5000 և ավելի աշակերտների շրջանում։ Հավաքագրվել է ոլորտում բազմամյա փորձառություն ունեցող 29 ուսուցիչ, որոնք տեսադասերի, վեբինարների, գրավոր և այլ նյութերի միջոցով մատուցել են առարկայական ծրագրերը։ Հեռավար ուսուցման կազմակերպման բաժնի ղեկավար, «E-school» ծրագրի տնօրեն Հայկ Դավեյանի խոսքով՝ ուսուցիչների ընտրությունը կատարելուց հետո շատ կարևոր էր նրանց համար մշակել աջակցության համակարգ՝ առարկայական ուսումնական ծրագրերն արդյունավետ մշակելու նպատակով։ Ներդրվել է աջակցման այնպիսի մեխանիզմ, որ մենթորներից և ավագ ուսուցիչներից յուրաքանչյուրն ունենա իր առարկայական խումբը։

Հավելենք, որ «E-school Armenia» ծրագիրը կյանքի է կոչվել կորոնավիրուսի համավարակի պայմաններում, երբ 2020 թվականից սկսած աշխարհը նոր մարտահրավերների առաջ էր կանգնել, և որպես առաջնահերթություն պետք էր ապահովել նաև կրթության շարունակականությունը։ E-school-ն արձագանք էր համավարակին, սակայն, այսօր այն դարձել է որակյալ էլեկտրոնային բովանդակության ստեղծման, էլեկտրոնային դասավանդման և փորձի կուտակման հարթակ։

Մասնավորապես, նախագծի ընթացքում հանրակրթական դպրոցի 1-12-րդ դասարանների աշակերտների համար մշակվել և նկարահանվել է շուրջ 2000 տեսադաս, այդ թվում՝ ժեստերի լեզվով, որոնք մշտապես հասանելի են «E-school Armenia»-ի Youtube-յան ալիքում։ Հանրակրթական առարկայական ծրագրերին համապատասխան՝ ուսուցիչները մենթորների օգնությամբ մշակել են առարկայական ծրագրերը և թեմատիկ պլանները և դրանց համապատասխան նկարահանվել են տեսադասեր, պատրաստվել նյութեր և իրականացվել վեբինարներ։

Հիշեցնենք, որ գործում է նաև սահմանամերձ և բարձրլեռնային համայնքներ ուսուցիչների գործուղման էլեկտրոնային շտեմարանը՝ kadrer.emis.am, որտեղ այս պահին ներկայացված է 196 թափուր հաստիք։

Համավարակը և կրթության շարունակականության ապահովումը Հայաստանում. ամփոփվել է «E-school Armenia» ծրագիրը

Հուլիսի 15-ին Կրթական տեխնոլոգիաների ազգային կենտրոնը Հայաստանում ՅՈՒՆԻՍԵՖ-ի գրասենյակի հետ կազմակերպել էր «E-school Armenia» ծրագրի ամփոփիչ միջոցառումը:

Միջոցառմանը ներկա էր նաև ՀՀ կրթության, գիտության, մշակույթի և սպորտի նախարարի տեղակալ Ժաննա Անդրեասյանը: Հանդիպմանը միջոցառման մասնակիցներին, այդ թվում՝ ՀՀ մարզերի և Երևանի դպրոցների տնօրեններ, ուսուցիչներ, ծնողներ, ներկայացվել են արտակարգ իրավիճակների պայմաններում կրթության կազմակերպման հայաստանյան փորձը, «E-school Armenia» ծրագրի, էլեկտրոնային ուսուցման որակի ապահովման մեխանիզմների հետագա քայլերը և այլն:

COVID-19 համավարակի պայմաններում, 2020 թ.-ից սկսած, աշխարհը նոր մարտահրավերների առաջ էր կանգնել: Որպես առաջնահերթություն՝ պետք էր ապահովել նաև կրթության շարունակականությունը՝ ստեղծված իրավիճակում արագ ինքնակազմակերպվելով: Սկսած հեռավար ուսուցման դասընթացների նկարահանման հրապարակը սեփական ռեսուրսներով կահավորելուց (գորգեր՝ սրահի ձայնը խլացնելու համար), տեսախցիկին անծանոթ մանկավարժներին հաղորդավարական հմտություններ սովորեցնելուց մինչև հեռավար ուսուցման վերաբերյալ քաղաքականության մշակումը՝ ԿԳՄՍ նախարարությունը, Կրթական տեխնոլոգիաների ազգային կենտրոնը ՄԱԿ-ի մանկական հիմնադրամի համագործակցությամբ, ուսուցիչ-աշակերտ համայնքի ջանքերի ներդրմամբ հաղթահարել են մարտահրավերը:

Ժաննա Անդրեասյանը շնորհակալություն է հայտնել միջոցառումը կազմակերպելու համար՝ այն որակելով կրթության շարունակականության ապահովման գործընթացում որպես հետհայացք համավարակից ի վեր անցած զարգացումներին և դժվարություններին:

«Համավարակը լուրջ մարտահրավեր էր ամբողջ աշխարհի համար, շուրջ 1,5 մլրդ երեխա զրկված էր կրթության շարունակականության հնարավորությունից: Ակնհայտ էր՝ ոչ մի երկիր չուներ լուծում՝ չունենալով նախադեպը, որպեսզի այդ փորձով հնարավոր լիներ հասկանալ խնդրի լուծման ճանապարհները: Այդ պայմաններում միակ տարբերակը հեռավար կրթության կազմակերպումն էր: Սա բազմաբնույթ փորձ էր տարբեր համայնքների, ուսուցիչների ու մասնագետների նախաձեռնություններով»,- ասել է փոխնախարարը՝ հավելելով, որ ընթացքում հնարավորինս փորձ է արվել նախանշել այն ուղեցույցներն ու ճանապարհները, որոնք հնարավորություն կտային գործողությունները դարձնել ավելի թիրախային և արդյունավետ:

«Որոշ բաներում հաջողեցինք, որոշներում՝ ոչ, բայց կարծում եմ՝ փորձառությունը շատ օգտակար էր և բերեց մի շարք դրական հետևանքների»,- ընդգծել է Ժ. Անդրեասյանը՝ անդրադառնալով ձեռքբերումներին:
Կրթական տեխնոլոգիաների ազգային կենտրոնը (ԿՏԱԿ) ամեն տարի իրականացնում է հետազոտություն՝ դպրոցներում տեղեկատվական տեխնոլոգիաների կարիքների և ուսուցիչների հմտությունների վերաբերյալ: 2019 թ. հետազոտությամբ ուսուցիչներից ոչ ոք չէր նշել, որ ունի հեռավար ուսուցման հմտություն: Այսօր այդ նույն հետազոտությունը ցույց կտա տրամագծորեն հակառակ իրավիճակ: Միայն անցած տարի ավելի քան 7000 ուսուցիչ վերապատրաստվել է տարբեր հարթակներում, մշակվել են 3 առցանց դասընթացներ՝ ծանոթացնելու տեխնոլոգիական հիմնական գործիքներին և մանկավարժական հմտություններին: Դասընթացները կազմակերպվել են ՄԱԿ-ի մանկական հիմնադրամի և Կրթական տեխնոլոգիաների ազգային կենտրոնի համատեղ ջանքերով:

Նախարարի տեղակալ Ժաննա Անդրեասյանը «E-school Armenia» ծրագրի իրականացման ճանապարհին կարևորել է նաև այդ ոլորտում քաղաքականության մշակման հնարավորությունը. «Մենք կարգավորեցինք նաև իրավական դաշտը՝ կազմելով հեռավար ուսուցման կարգը՝ դրանով այլ իրավիճակների համար ևս հնարավորություն ստեղծելով: Էլեկտրոնային ուսուցումը նպաստավոր է ոչ միայն այս կամ այն պատճառով դպրոց չհաճախող աշակերտների, այլև սփյուռքի մեր հայրենակիցների համար՝ շեշտադրելով հայագիտական բովանդակությունը»:

Ձեռքբերումների շարքում շեշտվել է կրթական որոշ գործընթացների թվայնացումը, մասնավորապես էլեկտրոնային մատյանների ներդրված գործիքակազմի ստեղծումը, որն ունի ֆինանսական հետևանքներ. իրականացվում է առանց տպագրական և թղթային աշխատանքների: Այս տարբերակով դպրոցում մանկավարժի աշխատանքն առավել արդյունավետ է կազմակերպվում, և կրճատվում է վարչարարական աշխատանքը: Նոր գործիքակազմի հետ կապված խնդիրները շտկման փուլում են, և սեպտեմբերին մանկավարժները կաշխատեն թարմացված տարբերակով:

Հայաստանում ՅՈՒՆԻՍԵՖ-ի գրասենյակի կրթական ծրագրերի ղեկավար Ալվարդ Պողոսյանը կարևորել է 21-րդ դարում թվային ռեսուրսներից օգտվելու հնարավորությունները՝ միաժամանակ հավելելով. «Պետք չէ սահմանափակվել միայն դրանով. շատ կարևոր է հաշվի առնել նաև երեխաների և ուսուցիչների սոցիալ-հոգեբանական աջակցության դերը և միջոցառումներ ձեռնարկել երեխաների շփումները, համագործակցություններն ապահովելու համար»:
Նա անգնահատելի է համարել ուսուցիչների, տնօրենների դերն աննախադեպ ծանրաբեռնվածությամբ հեռավար ուսուցումը հաղթահարելու գործում:

Կրթական տեխնոլոգիաների ազգային կենտրոնի տնօրեն Արտակ Պողոսյանը պատմել է համավարակի պայմաններում անցած ճանապարհի և հետագա անելիքների մասին. «Այսօր արդեն փորձում ենք «հեռավար ուսուցում» տերմինի փոխարեն գործածել էլեկտրոնային ուսուցումը, որն ավելի լայն համակարգ է: Դրա գաղափարն էլեկտրոնային գործիքների միջոցով կրթությունն ավելի որակյալ և արդյունավետ դարձնելն է: Կան շատ դեպքեր, որոնք հաշվի առնված չեն, և դրանց մշակման աշխատանքներն անպայման իրականացվելու են: Շնորհակալություն ամբողջ կրթական հանրությանը՝ սկսած նախարարությունից մինչև յուրաքանչյուր աշակերտ, որոնք մեծ ջանքեր գործադրեցին՝ համավարակի պայմաններում ապահովելով Հայաստանում կրթության շարունակականությունը»:

Աղբյուր՝ ՀՀԿԳՄՍ կայք

Նոր հեռավար դասընթաց՝ «Ուսումնական գործընթացի կազմակերպման առցանց միջոցներ» թեմայով

Կրթական տեխնոլոգիաների ազգային կենտրոնի մասնագետները մշակել են և պարբերաբար կվարեն դասավանդողների համար նախատեսված չորս շաբաթյա նոր հեռավար դասընթաց՝ «Ուսումնական գործընթացի կազմակերպման առցանց միջոցներ» թեմայով։

Դասընթացի հիմնական նպատակն էլեկտրոնային կրթության ընթացքում ՏՀՏ որոշ միջոցների կիրառման հմտությունների ուսուցումն է։

Դասընթացի ավարտին մասնակիցները կտիրապետեն  այնպիսի ծրագրերի և հավելվածների, որոնց օգնությամբ կկարողանան արդյունավետ կազմակերպել ուսումնական գործընթացի բոլոր հիմնական փուլերը․

  • դասի նախագծում (Mind Meister),
  • անհրաժեշտ ուսումնական էլեկտրոնային տեսանյութերի ստեղծում (CamStudio)
  • համացանցում տեղակայում (Youtube, Microsoft Whiteboard)
  • գիտելիքի ստուգում և գնահատում (Microsoft Forms)։

Ընդգրկված առցանց միջոցները հնարավոր է ինտեգրել նաև Microsoft Teams հարթակում հեռավար դասերի կազմակերպման ժամանակ։

«Ուսումնական գործընթացի կազմակերպման առցանց միջոցներ» թեմայով դասընթացները կկազմակերպվեն պարբերաբար։ Դասընթացի նյութերը հասանելի (ազատ) կլինեն ԿՏԱԿ-ի «Հեռավար ուսուցման կենտրոնի» հարթակում https://dlc.armedu.am/՝ բոլոր դասավանդողների համար։

Աղբյուր՝ Կրթական տեխնոլոգիաների ազգային կենտրոնի կայք

Մեկնարկում է «Հեռավար ուսուցում կազմակերպելու հմտություններ» թեմայով 7-րդ դասընթացը


ԿՏԱԿ-ի «Հեռավար ուսուցում կազմակերպելու հմտություններ» թեմայով հեռավար 7-րդ դասընթացը կմեկնարկի դեկտեմբերի 7-ին, որին մասնակցելու համար անհրաժեշտ է լրացնել https://forms.gle/BoQJExxFEjYoLEww6 հղումով հայտը։

Դասընթացի ավարտին մասնակիցները կստանան Moodle համակարգում աշխատելու հմտություն, որի օգնությամբ կկարողանան ստեղծել առարկայական կամ մասնագիտական վերապատրաստման հեռավար դասընթացներ և վարել դրանք:

Հեռավար վերապատրաստման գործընթացն առավել ընկալելի և հարմարավետ դարձնելու նպատակով դասընթացի բովանդակությունը հարստացվել է տեսադասերով, իսկ միջավայրում ներառվել են տեսահանդիպումներ կազմակերպելու նոր հարմարավետ գործիքներ։

2020 թվականի դեկտեմբերի 7-ից դեկտեմբերի 21-ը մասնակիցները կուսումնասիրեն Moodle միջավայրում հեռավար դասընթացներ ստեղծելու գործիքակազմը և ձեռք կբերեն անհրաժեշտ հմտություններ, որից հետո, մինչև 2021 թվականի հունվարի 15-ը, ցանկացողները կարող են մշակել և համակարգում տեղադրել հեռավար դասընթացների իրենց նախագծերը:

Դասընթացին ակտիվ մասնակցելու և հաջողված նախագիծ ներկայացնելու համար ուսուցիչները կստանան ԿՏԱԿ-ի հավաստագրեր, ինչպես  նաև՝ «Հեռավար ուսուցում» համակարգում իրենց մշակած դասընթացները վարելու հնարավորություն։

Հարգանքով և արդյունավետ համագործակցության ակնկալիքով՝
Կրթական տեխնոլոգիաների ազգային կենտրոն