Հեռավար ուսուցման համալիր էջ

Գլխավոր էջ  /  Նորություն

Նորություններ

ՏԵՂԵԿԱՏՎՈՒԹՅՈՒՆ Հայաստանի Հանրապետության բարձրագույն ուսումնական հաստատությունների բակալավրի ու անընդհատ եվ ինտեգրացված կրթական ծրագրերով (առկա) 2020/2021 ուսումնական տարվա ըստ բուհերի եվ մասնագիտությունների ընդունելության քննությունների ցանկի վերաբերյալ   
               
ՆԵՐԲԵՌՆԵԼ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԵՏԱԿԱՆ ԵՎ ՈՉ ՊԵՏԱԿԱՆ ԲԱՐՁՐԱԳՈՒՅՆ ՈՒՍՈՒՄՆԱԿԱՆ ՀԱՍՏԱՏՈՒԹՅՈՒՆՆԵՐ 2020-2021 ԱՌԿԱ ՈՒՍՈՒՄՆԱԿԱՆ ՏԱՐՎԱ  ԸՆԴՈՒՆԵԼՈՒԹՅԱՆ

ՍԿԶԲՈՒՆՔՆԵՐ

Դիմորդները ընդունելության քննության և մասնագիտությունների նշումով դիմում-հայտը ԳԹԿ են ուղարկում էլեկտրոնային (առցանց) եղանակով՝ մայիսի 25-ից մինչև հունիսի 15-ը, ժամը 18.00՝ միասնական քննության համար ԳԹԿ հաշվեհամարին փոխանցելով 1500դրամ:

Դիմորդներն ընդունելության դիմում-հայտում իրենց ընտրությամբ և ցանկացած հաջորդականությամբ հայտագրում են մասնագիտությունները՝ ըստ ուսուցման անվճար և վճարովի համակարգերի: Համաձայն ընդունելության դիմում-հայտի` դիմորդը կարող է մասնակցել մեկ կամ մի քանի բուհերի` մինչև երկու անվճար և մինչև ութ վճարովի մասնագիտությունների մրցույթին, եթե ընտրած բոլոր մասնագիտությունների համար սահմանված է ընդունելության մրցութային միևնույն առարկայի քննությունը:

 Դիմորդին չի թույլատրվում ներկայացնել մեկից ավելի ընդունելության դիմում-հայտ: Բուհեր կարող են ընդունվել միջնակարգ, նախնական մասնագիտական կամ միջին մասնագիտական կրթություն ունեցող անձինք առանց տարիքի սահմանափակման:

 

Միասնական և ներբուհական քննություններն անցկացվում են մեկ փուլով` հուլիս ամսվա առաջին տասնօրյակում:

Անվճար և վճարովի ուսուցման ընդունելության մրցույթներն անցկացվում են երկու փուլով՝ հիմնական և լրացուցիչ:

Մասնագիտությունների մրցույթն անցկացվում է ընդունելության դիմում-հայտի առաջին տողով ընտրված մասնագիտության՝ անվճար և վճարովի ուսուցման հայտի գերակայությամբ:

 

 Առաջին հայտագրված մասնագիտության մրցույթով չանցած դիմորդների համար մրցույթն անցկացվում է ընդունելության դիմում-հայտում հայտագրված մասնագիտությունների հերթականությանը համապատասխան,եթե նշված մասնագիտություններում առկա են թափուր տեղեր:

 

Ընդունելության դիմում-հայտում հայտագրված որևէ մասնագիտությամբ (ըստ հայտագրման հերթականության) ընդունված դիմորդը չի մասնակցում հայտագրված հաջորդ մասնագիտությունների մրցույթին:

 

Ընդունելության մրցութային առարկայի քննությունից հավասար միավորների դեպքում, ըստ հերթականության, առավելություն է տրվում`

  • մեդալակիր դիմորդներին.
  • արվեստի գծով միջազգային և հանրապետական մրցույթների հաղթողներին.
  • հանրակրթական ուսումնական հաստատություններում 10-12 դասարաններում սովորելու ընթացքում դպրոցականների հանրապետական առարկայական օլիմպիադաների առաջին կարգի դիպլոմ ստացած դիմորդներին.
  • ցանկում տվյալ մասնագիտության տողում առկա աստղանիշով (*) մեկ առարկայի դեպքում ավարտական փաստաթղթում առավել բարձր գնահատական ունեցող դիմորդներին, իսկ աստղանիշով(*) մեկից ավելի առարկաների դեպքում՝ այդ առարկաների գնահատականների միջին թվաբանական առավել բարձր միավոր ունեցող դիմորդներին.
  • պետական ավարտական քննություններից միջին թվաբանական առավել բարձր գնահատական ունեցող դիմորդներին.
  • տվյալ մասնագիտությանը համապատասխան միջին մասնագիտական կրթություն ստացած դիմորդներին:

Անվճար և վճարովի ուսուցման մրցույթների հիմնական փուլի արդյունքներն ամփոփվում են մինչև տվյալ տարվա հուլիսի 18-ը:

 

Ներբուհական քննությունների արդյունքներով մրցույթն անցկացվում է համապատասխան բուհում: Մրցույթի արդյունքը հաստատվում է հանրապետական ընդունող հանձնաժողովում, որից հետո բուհի ռեկտորը հրամանագրում է ուսանողներին:

 

Լրացուցիչ փուլ

Հանրապետական ընդունող հանձնաժողովի կողմից ընդունելության քննությունների հիմնական փուլի մրցույթի արդյունքները հաստատվելուց հետո, բուհերում մասնագիտությունների թափուր տեղերի առկայության դեպքում, ընդունելության քննությունից դրական միավոր ստացած, սակայն մրցույթից դուրս մնացած դիմորդները կարող են մասնակցել թափուր տեղերի մրցույթին: Թափուր տեղերի մրցույթին մասնակցելու համար դիմորդները մասնագիտությունների նշումով նոր դիմում-հայտը ԳԹԿ են ուղարկում էլեկտրոնային (առցանց) եղանակով հուլիսի 20-ից մինչև հուլիսի 22-ը, ժամը 18.00:

Դիմորդները ընդունելության դիմում-հայտում իրենց ընտրությամբ և ցանկացած հաջորդականությամբ հայտագրում են թափուր տեղեր ունեցող մասնագիտությունները՝ ըստ ուսուցման անվճար և վճարովի համակարգերի:

 Համաձայն ընդունելության դիմում-հայտի դիմորդը կարող է մասնակցել մեկ կամ մի քանի բուհերի վճարովի մասնագիտությունների թափուր տեղերի մրցույթին՝

եթե ընտրած մասնագիտության համար պահանջվող ընդունելության մրցութային քննությունից ունի դրական միավոր.

 եթե դրական միավորով քննությունը տվյալ մասնագիտության համար ընդունելության մրցութային քննությունը չէ, բայց ընդգրկված է տվյալ մասնագիտության քննությունների ցանկում:

Առավելությունը տրվում է տվյալ մասնագիտության համար պահանջվող ընդունելության մրցութային քննությանը:

Հանրապետական ընդունող հանձնաժողովը բուհերում լրացուցիչ փուլի մրցույթի արդյունքները հաստատում է հուլիսի 25-ին:


Ստեղծված իրավիճակում ուսումնական տարվա ավարտի ու ընդունելության գործընթացի կազմակերպումը ՀՀ կրթության, գիտության, մշակույթի և սպորտի նախարար Արայիկ Հարությունյանն ու նախարարի տեղակալ Ժաննա Անդրեասյանն ուղիղ եթերում ներկայացրել են, թե ինչպես է կազմակերպվելու ուսումնական տարվա ավարտն ու ընդունելության գործընթացը կորոնավիրուսի տարածումը կանխարգելելու նպատակով հայտարարված արտակարգ դրության պայմաններում ստեղծված իրավիճակում:

Ուսումնական տարվա ամփոփում

  • Հեռավար եղանակով ուսուցումը շարունակվում է մինչև ուսումնական տարվա ավարտը. հնգօրյա ուսումնական շաբաթի դեպքում՝ մինչև մայիսի 22-ը, վեցօրյա ուսումնական շաբաթի դեպքում՝ մինչև մայիսի 23-ը: Բաց թողնված դասերը հաշվառվում են ըստ հեռավար ուսուցմամբ ծածկված ծավալի։ Դպրոցները հաջորդ ուսումնական տարում լրացնում են բաց թողնված դասերը։ Հեռավար ուսուցմամբ նախատեսված ծավալը լրացրած դպրոցների և ուսուցիչների առաջ բաց թողնված դասերի լրացման պահանջ չի դրվում կամ դրվում է միայն բաց թողնված դասերի չափով։ «Քննարկում ենք, թե ինչ իրավիճակ է այժմ և նախատեսում ենք, որ հաջորդ ուստարում սեպտեմբեր և հոկտեմբեր ամիսներին կունենանք շաբաթ օրերի պահուստային օրեր: Քննարկում ենք նաև ուստարին մեկ շաբաթով շուտ սկսելու հնարավորությունը, բայց դա ևս կապված է մայիսի ամփոփումից: Արձանագրենք, որ հեռավար ուսուցմամբ մենք մայիս ամիսը փակում ենք, և էլեկտրոնային մատյանների տվյալներով կհասկանանք, թե ինչ ծավալի աշխատանք է կատարվել»,-ասել է ԿԳՄՍ նախարար Արայիկ Հարությունյանը։
  • Հանրակրթական ուսումնական հաստատություններում տարեկան գնահատականներն ամփոփվում են մինչև մարտի 13-ը ունեցած և էլեկտրոնային մատյաններ փոխադրած գնահատականների հիման վրա: Հանրակրթական ուսումնական հաստատություններում 4-րդ և 9-րդ դասարանների ավարտին կրթական մի աստիճանից մյուսը փոխադրվելու քննություններ չեն իրականացվելու:
  • Աշակերտների՝ մինչև մարտի 13-ն ունեցած և էլեկտրոնային մատյաններ փոխադրած գնահատականների հիման վրա ամփոփվում են նրանց տարեկան գնահատականները, որոնցից քննական առարկաների տարեկան գնահատականները համարվում են նաև քննական։ Այդ գնահատականների հիման վրա աշակերտները փոխադրվում են հաջորդ աստիճան: Փոխադրական քննություններ չեն իրականացվի նաև ավագ դպրոցի 10-րդ և 11-րդ դասարաններում, ամփոփումը տեղի է ունենում նույն ձևով:
  • Դպրոցներում ավարտական՝ 12-րդ դասարանի քննություններ չեն իրականացվում, ամփոփումը տեղի է ունենում նույն ձևով, ինչ 4-րդ և 9-րդ դասարանների դեպքում: Հաշվի առնելով, որ աշակերտների մի մասը քննությունները հանձնել են նախորդ տարվա դեկտեմբերին, վերջիններս հնարավորություն է տրվում ընտրել՝ պահպանել քննության արդյունքը, կամ ընտրել տարեկան գնահատականը՝ որպես ատեստատում քննական գնահատական: Ամփոփումը կատարվում և ատեստատները տրվում են մինչև մայիսի 25-ը:

Բուհերի ավարտական քննություններ և դիպլոմային աշխատանքներ

  • Բուհերում ավարտական պետական քննությունների անցկացման ձևն ընտրում է ուսումնական հաստատությունը` ակադեմիական ազատության և ինքնավարության շրջանակում: Քննությունների կազմակերպման ընթացքում բուհերը պետք է պահպանեն համավարակի կանխարգելման ընդհանուր կանոնները և քննությունները կազմակերպեն առցանց գործիքների կիրառությամբ՝ գործընթացը ավարտելով մինչև հուլիսի 1-ը:
  • Որոշվել է, որ դիմորդները բուհ ընդունվելու համար այս տարի կհանձնեն մեկ քննություն: Միասնական քննությունների ցանկը՝ ըստ մասնագիտությունների, կհայտարարվի ապրիլի 30-ին: Ընտրվող քննությունը լինելու է տվյալ մասնագիտության համար նախատեսված քննություններից որևէ մեկը:
  • Ըստ ընթացակարգի` մինչև մարտի 15-ը դիմորդներն արդեն լրացրել են բուհերի ընդունելության հայտերը: Քանի որ այժմ տեղի է ունենում ընթացակարգի փոփոխություն, անհրաժեշտություն է առաջացել հայտագրման նոր հնարավորություն տալ թե՛ արդեն հայտագրվածներին, թե՛ նախորդ տարիների շրջանավարտներին: Քննությունների հայտագրման գործընթացը միավորվել է բուհեր դիմելու հայտերի լրացման հետ` որպես մեկ միասնական գործընթաց: Հայտագրման գործընթացը կմեկնարկի մայիսի 25-ից և կգործի մինչև հունիսի 15-ը: Հայտագրումը կիրականացվի էլեկտրոնային եղանակով: Դիմորդները միաժամանակ կընտրեն քննական առարկան, բուհն ու մասնագիտությունը:
  • Նախապես հայտագրված բոլոր դիմորդները նույնպես կարող են հայտագրվել այս ընթացքում՝ հնարավորություն ստանալով վերահաստատել կամ փոխել նախնական հայտը՝ հաշվի առնելով տեղի ունեցած փոփոխությունները: Նախապես մի քանի քննության համար հայտագրված դիմորդներին կվերադարձվի քննությունների համար վճարած գումարը:
  • Ընդունելության մեկ հիմնական քննությունը կազմակերպվելու է համավարակի անվտանգության բոլոր կանոնների պահպանմամբ: Քննական կենտրոնները կգործեն ամբողջ հանրապետությունում` ապահովելով քննություն հանձնող դիմորդների սահմանափակ թիվն ըստ քննական սենյակների և կենտրոնների:
  • Բուհերի ընդունելության միասնական քննությունները տեղի կունենան հուլիսի առաջին տասնօրյակում: Արվեստի և սպորտի բուհերը ևս պետք է կազմակերպեն ընդունելությունը մեկ քննության միջոցով: Բանավոր ընդունելության քննություններ չեն նախատեսվում:

Միջպետական ծրագրերով ընդունելություն

Օտարերկրյա պետությունների բարձրագույն ուսումնական հաստատություններում միջպետական համաձայնագրերով ՀՀ կրթության, գիտության, մշակույթի և սպորտի նախարարությանը հատկացված կրթաթոշակային տեղերի 2020-2021 թթ. ուսումնական տարվա մրցույթը կիրականացվի՝ ելնելով գործընկեր պետությունների հետ հստակեցումներից՝ դրանց անցկացման ժամանակի և ուսուցման հետագա կազմակերպման հնարավորությունների մասով: Ընդունելության պայմանների մասով նախատեսվում է, որ այդ ծրագրերով ընդունելությունը (բակալավրի (դիպլոմավորված մասնագետի), մագիստրատուրայի, ասպիրանտուրայի (օրդինատուրա) և դոկտորանտուրայի կրթական ծրագրերով) անցկացվում է այս ուսումնական տարում՝ ընդունելության կարգին համապատասխան, եթե տվյալ միջպետական համաձայնագրով այլ պայմաններ սահմանված կամ նախատեսված չեն:

Մագիստրատուրա և ասպիրանտուրա

  • Մագիստրատուրայում ընդունելության ժամկետներն առաջարկվում է սահմանել հունիսի 16-ից 30-ը և արդյունքներն ամփոփել մինչև հուլիսի 5-ը:
  • Ասպիրանտուրայում ընդունելության գործընթացում առաջարկվում է կասեցնել ոչ մրցութային առարկաների` օտար լեզվի, ինֆորմատիկայի և տեղեկատվական հաղորդակցության հիմունքներից ստացված համապատասխան միավորը հավաստող վկայականի կամ տեղեկանքի ներկայացման պահանջը: Առաջարկվում է գործընթացն իրականացնել հունիսի 16-ից 30-ը և արդյունքներն ամփոփել մինչև հուլիսի 5-ը:

Քոլեջներ և ուսումնարաններ

  • Քոլեջների և ուսումնարանների ավարտական դիպլոմային աշխատանքների պաշտպանություն և քննություններ չեն իրականացվում: Ամփոփումը կատարվում է այնպես, ինչպես դպրոցական ավարտականների պարագայում: Եթե սովորողը գնահատական չունի երկրորդ կիսամյակում, տարեկանը նշանակվում է առաջին կիսամյակի հիման վրա: Ամփոփումը կատարվում և դիպլոմները տրվում են մինչև հունիսի 5-ը:
  • Քոլեջների և ուսումնարանների հետ կապված ընդունելությունը՝ 9-ամյա կամ 12-ամյա կրթության հիմքով, նախատեսվում է կազմակերպել հիմնականում ատեստատների գնահատականներով օգոստոսին, բացի արվեստի, սպորտի և առողջապահական հաստատություններից, որտեղ իրականացվում է մեկական քննություն նույն սկզբունքներով, ինչ բուհեր ընդունվելու դեպքում: Հայտերի ընդունումը նույնպես իրականացվում է էլեկտրոնային եղանակով:

Ոսկե մեդալի քննություններ և վերջին զանգ

  • Ոսկե մեդալի քննություններ այս տարի չեն իրականացվելու. այն շրջանավարտները, որոնք ոսկե մեդալի հավակնորդ են, հաջորդ տարի հնարավորություն կունենան մասնակցելու քննությունների։
  • «Վերջին զանգի հետ կապված որոշել ենք հետևյալը. երբ համավարակն այլևս խնդիր չլինի, և սահմանափակումներ չլինեն, մենք միասին որևէ օր կորոշենք և համատեղ կիրականացնենք Վերջին զանգի արարողությունը։ Նախարարություններն ու պաշտոնյաները ևս կմիանան ձեզ»,-ասել է ԿԳՄՍ նախարարը։ Արայիկ Հարությունյանը նաև ընդգծել է, որ արտակարգ դրության պայմաններում որևէ ոլորտում իդեալական աշխատանքային վիճակ լինել չի կարող, ուստի արվել է առավելագույնը ստեղծված իրավիճակում կրթական գործընթացի շարունակականություն ապահովելու և ուսումնական տարվա ավարտն ու ընդունելության գործընթացը հնարավորինս արդյունավետ կազմակերպելու համար:

Իրավական դաշտի համապատասխանեցում

  • Վերոնշյալ բոլոր փոփոխությունները արտացոլող իրավական ակտերն այժմ վերջնականացվում են և առաջիկայում կհաստատվեն: Տեղեկացնենք նաև, որ բուհերի ընդունելության քննությունների հետ կապված լրացուցիչ պարզաբանում կլինի ապրիլի 30-ին, որի ընթացքում կհրապարակվի նաև ըստ մասնագիտությունների քննությունների ցանկը:
  • Արտակարգ իրավիճակում ավարտական և միասնական քննությունների կազմակերպման գործընթացում փոփոխություններ նախատեսելիս հաշվի է առնվել զորակոչի ժամկետներն անփոփոխ թողնելու հանգամանքը:
  • Ուսումնական տարվա ավարտի և հաջորդ ուսումնական տարվա ընդունելության գործընթացին վերաբերող ամբողջ տեղեկատվությունը հասանելի կլինի heravar.armedu.am կայքում՝ առաջին էջում առանձնացված «Ավարտական և ընդունելության քննություններ» բաժնում՝ սկսած ապրիլի 28-ից:
Առցանց դասավանդման արագացված դասընթաց ուսուցիչների համար ՅՈՒՆԵՍԿՕ-ի կրթության ոլորտում տեղեկատվական տեխնոլոգիաների ինստիտուտը (UNESCO Institute for Information Technologies in Education) և գործընկերները միավորում են ջանքերը այնպիսի լուծումներ մշակելու համար, որոնք կօգնեն հանրակրթական և մասնագիտական կրթության համակարգերին՝ դիմակայել իրենց առջև ծառացած աննախադեպ մարտահրավերները: Այս ճգնաժամի հետևանքները վերացնելու համատեղ գործողությունների շարքում կարևորագույն խնդիրներից մեկն ուսուցիչների առցանց ուսուցման համար անհրաժեշտ գիտելիքների և հմտությունների ձեռքբերմանն օժանդակելն է:

Համդան Բին Մուհամմեդ Սմարթ համալսարանը (HBMSU) մշակել է «Ինչպես 24 ժամվա ընթացքում դառնալ առցանց ուսուցիչ» անվճար արագացված դասընթացը, որի ռուսերեն տարբերակը ԱՊՀ երկրների ուսուցիչների համար պատրաստվել է UNESCO IITE-ի մասնակցությամբ: Դասընթացը նախատեսված է ուսումնական հաստատությունների զանգվածային փակման պարագայում հեռավար կրթությանը հարկադրված անցում կատարելու ընթացքում ուսուցիչներին աջակցելու համար։ HBMSU պաշտոնական կայքում արագացված դասընթացը հասանելի է մի քանի լեզուներով։ Դասընթացը մշակվել է առցանց դասավանդման քիչ փորձ ունեցող ուսուցիչների համար և կօգնի նրանց վերակազմակերպել իրենց աշխատանքը և իրականացնել արդյունավետ առցանց ուսուցում: Բացի այդ, դասընթացը պարունակում է առցանց ուսուցման օգտագործման համար նախատեսված նյութերի համատեղ մշակման հիմնական գործիքների նկարագրությունը։

2020-ի ապրիլի 2-ին տեղի ունեցավ դասընթացի ռուսերեն տարբերակի պաշտոնական բացման արարողությունը, որի մասնակցում էին ԱՄԷ-ի Կրթության նախարարը, HBMSU- ի ռեկտորը և UNESCO IITE-ի կառավարման խորհրդի անդամները:

Գործընկեր կազմակերպությունների կողմից պատրաստված բազմաթիվ օգտակար նյութեր և թվային կրթական ռեսուրսներ հասանելի են UNESCO IITE–ի «COVID-19․ Շարունակում ենք սովորել: Միավորե՛նք ջանքերը» պաշտոնական պորտալում։

123456»»